A dolumannu is abbisitas líbberas de sa gruta no ant sémpiri biu personas sensíbbilis a s'amparu de su beni e cussus prus pagu sensíbbilis ant pentzau de ponni sa firma de s'imbetzilidadi cosa insoru dannegendi custu fàbricu de incrostatzionis cun dannus de duus tipus. Su primu est su de sa grafomania, difatis unas cantu scritas sbisuriadoras funt in sa vasca manna de susu: custas scritas a dolumannu si bint de su percursu turísticu e duncas ndi ddas depint bogai umperendi totus cussus acorgimentus chi in custu casus ant permítiu su recúperu de is incrostatzionis sbisuriadas chentza de ddas dannegiai meda. Su segundu dannegiamentu imputàbbili a s'ómini est consístiu in s'arrogadura a corpus de marteddu de unas cantu vascas pruschetotu in sa parti chi càstiat faci a s'intrada arta. Est craru chi custas segaduras no permitint su funtzionamentu curretu de is vascas dannegiadas chi no si podint prus preni de àcuas e duncas mantenint sémpiri sicu s'oru de susu cun probbàbbili rovina de cussu etotu. Custu aparau de incrostatzionis s'arriu (torrenti) dd'at sgavau asuta ma custu fenòmenu s'est presentau infatu a sa traversa fata in s'arriu (torrenti). Custa, segundu is progetistas, depiat creai unu lagu in susu e intamis su "invasu" s'est prenu, giai in su primu annu, de aremadura e s'àcua, no tenendi prus su frenu de sa tzirculatzioni intra de sa perda e, arruendi a càscada, at pigau prus energia, arrannésciendi a arrasigai su letu chi fiat su pei de is vascas. Sa morali est chi innantis de intervenni in unu logu càrsicu tocat a connosci beni is mecanismus de su carsismu e operai scéti candu si tenit sa seguresa de smenguai is dannus.
