"... est inghitzau totu unu mengianu de su Càmbricu..."
Castiendi una carta geológica de sa Sardigna si podit osservai chi ddoi at medas coloris. Sa diosa de sa Geológia est stétia generosa cun sa Sardigna, donendiddi medas coloris diferentis chi rapresentant sa stória antiga, antiga meda de s'ísula; su Sulcis-Igresienti rapresentat s'inghitzu, sa parti prus atesu.
Prus de mesu miliardu de annus a oi, in su períodu chi is geòlogus narant Càmbricu, in su fundu de unu mari, diferenti meda de su de oi, si depositànt is arrocas chi iant èssiri bessidas is montis de su Sulcis-Igresienti. Caraterizat is montis chi connosceus oi una morfologia turmentada chi testimòngiat acontéssius geológicus longus meda. In s'àrea interessada ddoi est su sperrumu costeru chi andat de Buggerru a Masua e, passendi po Monteponi, lompit fintzas a is montis de su Marganai e a sa parti orientali de custu e nci torrat a pesai a su Fruminesu. Est una spétzia de singeddu chi, po sa preséntzia de giacimentus mineràrius importantis, ddi narant "aneddu metallíferu de s'Igresienti".
Su nómini "aneddu" fait pentzai a calincuna cosa de pretziosu e rendit beni sa bidea de s'arrichesa de su sutaterra. Sa preséntzia de giacimentus mineràrius importantis de Prumu, Zincu, Prata e calincuna borta Arràmini, Mercúriu, Fluorite, e aici sighendi, at permítiu in su tempus una grandu atividadi de bogadura. In custas arrocas antigas arricas de mineralis, s' àcua proixina e cussa callenti de su sutaterra cun s'aciunta de àtzidus fortis, ant portau a sa formatzioni de unu patrimóniu arricu de grutas naturalis.
In custu cuntestu seus a un'artària de prus o mancu 200 m. slm e seus in s'òru meridionali de cust'aneddu e in manera prus pretzisa in sa parti meridionali de is montis de su Marganai, su cúcuru Perd"e Cerbu (514 m. sml) e su monti Acqua (540 m, slm) funt is montis terminalis faci a Sud. Is montis calant faci a su pranu de su Cixerri e a sa bidda de Domusnoas.
